【創業第n日】 尋日我喺公司只係逗留咗三個半鐘,今日就逗留咗四個半鐘,但一個人去咗食一個半鐘lunch及沉思
有時都會覺得唔好意思,因為個個同事都咁勤力做嘢,而我就成日返得半日工,表面功夫做得唔係好足
但其實呢幾日我做緊乜? 其實係喺個腦入面砌緊一幅大picture,計劃緊將來要行嘅路
有一啲人做老細,做到自己好忙,張枱好亂,一日做十幾個鐘冇時間得閒
但咁嘅做事方式,唔係一間公司話事人應有嘅工作模式
我認為應有嘅話事人日常係:經常留意市場動態; 隨時準備好解答下屬嘅疑問; 不斷微調優化公司嘅做事方式; 了解下屬嘅進步成長
當然更加重要嘅係,搵出市場嘅機會啦
喺商業森林,就係冇人會鬧醒你。 你可以日日都做流水作業嘅嘢,然後覺得自己好盡力
但其實你要盡嘅力,係要盡力去思考、想像 、計劃。而唔係搞到自己踢曬腳周身唔得閒
工作、休息、研究、學習、計劃,就係咁糾纏不清。 係時候飲多杯咖啡提一提神先!
啱啱上網見到有個post……
原來social science係乞食科,其實我都係讀social science嘅
我唔夠膽講social science係乜嘢類型嘅科,但就絕對唔係乞食科,亦都唔相信世界上有一種科叫乞食科
我當初揀social science,係因為鍾意佢每樣嘢都可以學一啲,畀到我宏觀嘅視野,學到點樣去分析,點樣去研究
我記得Professor曾經有一句說話好具啟發性:「有一個學生為咗做到佢個研究,特登去學嗰一種佢完全唔識嘅語言」
嗰一刻我頓悟到,原來一個人係可以完完全全咁由唔識一樣嘢,然之後去學, 再深入研究,最後成為專家
呢個諗法就好似開咗一度門畀我,等我去自學,自己做研究,擁有某一方面嘅專長
當然,會計、法律、醫學……呢啲方面嘅專門知識,係唔能夠從social science 學得到嘅,但你都可以成為其他方面嘅專家呀!
例如成為培訓師、專欄作家、管理人員、創業者…… 等等,呢啲都係我做緊嘅
另外,正正因為social science令到你每樣嘢都掂一啲,你有能力管理來自唔同學科嘅下屬。最起碼,你知道佢能力去到邊度,可以做到啲乜嘢,做到乜嘢效果
因為,你學識咗點樣去學習
我覺得人才有兩種: 一種係「專才」,一種係「通才」
專才係例如律師、醫生、會計師……等等專科出嚟嘅,呢一方面唔使解釋你都明
而通才呢? 就係每一樣嘢都識少少,擁有宏觀視野,能夠操控大棋局嘅人
如果你係專才嘅話,你可能有一條好清晰嘅career path,收入喺事業起步嘅時候亦都比較有保障
而如果你係通才嘅話,當你升到中層或者高層嘅時候,你會覺得發揮得比專才更加得心應手
如果你係social science 或者文科畢業嘅話,你都可以有好多選擇呀。 你可以憑著努力由低做起爬上去,或者in各大公司嘅management trainee
睇到呢度你又可能會講: management trainee好難爭呀!
其實面試技巧,例如presentation、即席演講、小組討論……等等,全部都係有得練嘅
而且讀social science或者文科嘅人有一個優勢, 就係接觸文字比例如讀工程嘅更加多,理論上寫嘢會叻啲。 如果你覺得自己唔叻嘅,亦都可以自己惡補
我自己就喺二十幾歲嘅時候先至偷偷地讀返中學程度嘅grammar,彌補返中學時期嘅懶惰
再講多少少,呢個世界其實已經同幾十年前阿爸阿媽嗰代唔同咗樣。 以前有「讀完書」呢一樣嘢,而家就冇咗呢個concept
一個人離開咗學校唔代表佢「讀完書」,但讀書學嘢亦唔一定要喺學校
而家呢個世界嘅知識產生得好快,亦都過時得好快
喺學校學嘅係若干個思考框架同埋個基礎, 到出嚟社會之後,我哋就要「想知邊樣嘢,就去自學邊樣嘢」
講到呢度,其實唔存在乜嘢乞食科。�令一個人乞食嘅,其實係一早打定輸數嘅心態
心態,決定境界
當你發覺自己乜嘢都唔識嘅時候,你已經掌握到「呢個世界其實係好大」呢個道理,而呢一點,正正就係最理想嘅學習起點
秀吉
刪除評論
你確定要Del佐呢條評論?